பஞ்சேந்திரியா - கேவ்மேன் டயட்டும், போலி பன்னிக்குட்டியும்

கேவ்மேன் டயட் அனுபவம்.

நான் ஐந்து நாட்கள் முழு டயட்டில் இருந்தேன். செய்து கொடுக்க அம்மா இருந்தார். அவசர வேலையா ஊருக்கு சென்று விட்டதால் தொடர முடியவில்லை. நான் எனக்கும் சேர்த்து சமைப்பது வேலைப்பளுவை அதிகரிக்கிறது. என் வூட்டம்மாவுக்கு சமைப்பதில் எனக்கும் எடுத்துக் கொள்கிறேன்.

அந்த டயட் மூலம் எனக்கு ஐந்து நாட்களில் ஐந்து கிலோ குறைந்தது. டயட்டை விட்ட பிறகு கன்னாபின்னாவென்று பிரியாணியையும் மகாதியானத்தையும் தொடர்ந்ததால் இப்போது இரண்டு கிலோ ஏறி விட்டது. கண்டிப்பாக அடுத்த வாரம் முதல் கேவ்மேன் டயட் தான் இருக்கப் போகிறேன். அம்மா திங்களன்று சென்னை வருகிறார்.

இந்த டயட் முறையை அறிமுகப்படுத்திய காட்டான் மாம்ஸ்க்கு நன்றி.

பேஸ்புக்கில் ஆரோக்கியம் & நல்வாழ்வு என்ற பக்கத்தை துவக்கி மக்களுக்கு டயட் பற்றிய சந்தேகங்களுக்கு விளக்கமும் தேவைப்படுகிறவர்களுக்கு டயட் சார்ட் தயார் செய்து தரும் செல்வன்ஜி அவர்களுக்கு ஸ்பெஷல் நன்றி.

கேவ்மேன் டயட் என்றால் என்ன என்று தெரிந்து கொள்ள நினைப்பவர்கள் டயட் பற்றிய ஆலோசனை தேவைப்படுகிறவர்கள் தயக்கமில்லாமல் ஆரோக்கியம் & நல்வாழ்வு என்ற பேஸ்புக் பக்கத்தில் செல்வினை தொடர்பு கொண்டால் உங்களுக்கு உதவுவார்.

 ------------------------------------------------
 

------------------------------------------------

இது ஒரு பதிவர் அறிமுகம். 

நான் ஒரு சிறந்த பதிவரை எல்லாம் அறிமுகப்படுத்தப் போவதில்லை. அது மொக்கை என எனக்கும் தெரியும். இது வரை பதிவெழுதியவர்களும் எழுதப் போகிறவர்களும் மெத்தப் படித்தவர்கள் அல்லது சுமாராகவாவது படித்தவர்கள்.

ஆனால் போலி பன்னிக்குட்டி என்ற பெயரில் எழுதும் இவர் பள்ளிக்கூடம் சென்றது மூன்றாவது வரை மட்டும் தான். படிக்க பிடிக்காமல் அழுது அடம் பிடித்து அதன் பிறகு பள்ளிக்கே செல்லாமல் ஒரு டெய்லர் கடையில் வேலைக்கு சேர்ந்து தொழில் கற்று படிப்படியாக உயர்ந்து சொந்தமாக டெய்லர் கடை வைத்து நான்கு பேருக்கு வேலை கொடுக்கிறார்.

தமிழ் படிக்கத் தெரியாது. ஆனாலும் கவிதையில் மேல் ஆர்வத்தால் மற்றவர்களை படிக்கச் சொல்லி கேட்டு ரசிப்பார். இப்போ தனது கவிதைகளையும் இணையத்தில் பிரசுரிக்க முடியும் என சென்ற பதிவர் சந்திப்பிற்கு வந்த போது அறிந்ததால் தனக்கென தனி வலைப்பக்கம் துவக்கித்தரச் சொல்லி வற்புறுத்தியதால் துவக்கிக் கொடுத்தேன். 

இப்போ தினம் ஒரு கவிதையை யோசித்து வந்து தட்டச்சு செய்து தரச்சொல்லி வற்புறுத்தி பதிவிடுகிறார். அவரது எல்லாப்பதிவுகளையும் நான் தான் தட்டச்சு செய்கிறேன். அது மொக்கை என எனக்கு தெரிந்தாலும் அவரது ஆர்வத்தினை கெடுக்க விரும்பாமல் நான் தலையிடுவதில்லை.

அவர் என்ன சொல்கிறாரோ அப்படியே பதிவிடுகிறேன். அதனை படிக்கச் சொல்லி கேட்டு ரசித்து பெருமிதப்பட்டுக் கொள்கிறார்.

கன்னாபின்னாவென்று உயர் படிப்புகளை படித்து விட்டு வந்து பதிவெழுதுகிறேன் என்று படிப்பவர்களை கொல்லும் எவ்வளவோ பேர்களை விட ஏன் என்னையும் விட (ஆமாம் இவரு பெரிய இவரு) போலி பன்னிக்குட்டி மெச்சத்தக்கவர் தான். 

அவரது வலைத்தளம் http://adhithyarb.blogspot.com/

------------------------------------------------
 

------------------------------------------------

பதிவருக்கு பாராட்டு

இந்த பதிவுகில் தவிர்க்க முடியாத, அனைவருக்கும் தெரிந்த ஒரு பதிவர் உண்டென்றால் அது திண்டுக்கல் தனபாலன் தான். எந்த புது பதிவரின் பதிவாக இருந்தாலும் சரி நன்கு அறியப்பட்ட பதிவரின் பதிவாக இருந்தாலும் சரி. முதலில் படித்து கமெண்ட் இடுபவர் தலைவர் தான். 

பதிவுலகம் பக்கம் வந்த எல்லோருக்கும் ஆரம்பத்தில் இந்த பழக்கம் இருந்திருக்கும். போகப் போக இதனை யாருமே செய்ய மாட்டார்கள். ஆனால் விதிவிலக்காக இன்று வரை விடாமல் அனைத்து பதிவர்களின் பதிவுகளையும் விடாமல் படித்து கமெண்ட் இடுபவர் தனபாலன் தான். 

தங்களுக்கு என் பாராட்டுகளும் சிரம் தாழ்ந்த நன்றிகளும் தனபாலன் சார்.

ஆரூர் மூனா