Fast & Furious 6 - சினிமா விமர்சனம்

கொஞ்ச நாளா உங்களையெல்லாம் கவிதை என்ற பெயரில் ஒன்றை கிறுக்கி தொல்லைக் கொடுத்துக் கொண்டு இருக்கிறேன் என நினைக்கிறேன். திங்களன்று மச்சான் கிரகப்பிரவேசத்திற்காக ஊருக்கு சென்றிருந்தேன்.

அப்பொழுது ஒரு நண்பன் "எழுதுவது என்றால் எல்லாத்தையும் தான் எழுதனும். கட்டுரை மட்டும் எழுதி தப்பிச்சிக்கலாம் என்று நினைக்காதே" என்று சீண்ட அதற்காகத்தான் சில கவிதை என்ற பெயரில் கிறுக்கல்கள்.

எனக்கே தெரியும் இந்த வரிகளை வரிசைப்படுத்தி படித்துப் பார்த்தால் கட்டுரை போலவே இருக்கும். இருக்கட்டும். ஆயிரம் பேரை கொன்னாத்தான் அரை வைத்தியன் என்று சொல்வார்கள்.

அது போல் பல ஆயிரம் மொக்கை கவிதைகளை எழுதி பிறகு நல்ல கவிதை எழுத தொடங்குகிறேன். வழக்கம் போல இன்று சினிமா விமர்சனம். பெரிய படங்கள் எதுவும் இன்று வெளியாகாததால் எதிர்பார்ப்பிற்குரிய Fast and furious 6ம் பாகம் பார்க்கச் சென்றேன்.

எனக்கும் ஆங்கிலப் படங்களுக்குமான தொடர்பு எனக்கும் ஆங்கிலத்துக்குமான தொடர்பின் அளவிலேயே இருந்தது. அதாவது படத்தில் ஒரு வசனங்கள் இருக்கும். ஆனால் நானாக ஒரு அர்த்தம் பண்ணிக் கொள்வேன்.

உதாரணம் வேண்டுமானால் ரொம்ப நாட்களாக Van Damme என்ற பெயரை வான் டம்மி என்று தான் சொல்லிக் கொண்டு இருந்தேன். சென்னைக்கு வந்த பிறகு தான் அதனை வான் டாம் என்று உச்சரிக்க வேண்டும் என அறிந்தேன்.

ஆங்கிலப் படங்கள் தமிழ்ப்படுத்தி வர ஆரம்பித்த பிறகு தான் நிறைய படங்களை புரிந்து பார்க்க ஆரம்பித்தேன். இந்த படம் கூட 5ம் பாகம் வரும் வரை இந்தப் படத்தை பற்றிய ஆர்வம் பெரிதாக வந்ததில்லை. 5ம் பாகம் வந்த பிறகு தான் மற்ற பாகங்களை பார்த்தேன். அசந்து விட்டேன். கார் ரேசிங் இவ்வளவு விறுவிறுப்பாக எந்த படமும் வந்ததில்லை.

6ம் பாகத்தின் கதை ரஷ்ய நாட்டு ராணுவ ரகசியங்களை வில்லன் கும்பல் கடத்தி சென்று விடுகிறது. அவர்களிடம் இருந்து அதனை மீட்க அமெரிக்க ராணுவ அதிகாரி கடத்தல் கும்பல் தலைவனான வின் டீசலின் உதவியை நாடுகிறார். அவர் அவரது குழுவுடன் லண்டன் வந்து வில்லனுடன் மோதி பல ரேஸ்கள் நடத்தி ஸ்பெயினுக்கு பறந்து க்ளைமாக்ஸூக்கு வருகிறார். வில்லனை வீழ்த்தி படத்தை முடித்து வைத்து அடுத்த பாகத்திற்கும் அடி போடுகிறார்.

வின் டீசல் கட்டுமஸ்தான உடம்பு சும்மா கிண்ணென்று இருக்கிறது. வெறி கொண்டு அடி அடியென்று அடிக்கிறார். கார் ரேஸில் பின்னுகிறார். முடிவில் வில்லனின் கட்டுமஸ்தான அடியாளை தூக்கி ராக் அடிக்க கொடுக்கும் போது விசில் பின்னுகிறது.

தி ராக் என்று அறியப்பட்ட டிவெய்ன் ஜான்சன் மாமிச மலையாக வருகிறார். இந்த திட்டத்திற்கு அடித்தளமிட்டு படத்தை துவக்கி வைக்கிறார்.

முந்தைய பாகங்களில் வந்தவர்கள் அதே போல் வந்து அசத்தி செல்கிறார்கள்.

என்ன தான் இன்டர்நேசனல் படமாக இருந்தாலும் பாட்ஷா படத்தில் இருந்து காட்சியை சுட்டால் நம்மளால் கண்டுபிடிக்க முடியாதா என்ன. பாட்ஷா படத்தில் ரஜினியும் ரகுவரனும் சந்திக்கும் காட்சியில் மாடியில் ஒரு அடியாளை துப்பாக்கியுடன் நிற்க வைத்து சும்மா அங்க பாரு கண்ணா என்று டயலாக் விடுவார்களே, அதை அப்படியே சுட்டு படமாக்கியிருக்கிறார்கள். அய்யோ அய்யோ.

கார் ரேஸ்கள் படு அசத்தலாக படமாக்கப் பட்டு இருக்கிறது. கண்ணுக்கு விருந்து செம.

க்ளைமாக்ஸ் முன்பு வரும் டாங்கி சேஸிங் பைட்டும் க்ளைமாக்ஸில் வரும் விமான பைட்டும் ஏஒன். ஏன் எதற்கு எப்படி சாத்தியம் என்ற கேள்விகளையும் மூளையையும் கழற்றி வைத்து விட்டு படத்திற்கு சென்றால் ஒன்றரை மணிநேரம் பக்கா ஆக்சன் ப்ளாக்குக்கு நான் கியாரண்டி.

மிகப்பெரிய விமானத்தை இரண்டு ஜீப்களை வைத்து ஜஸ்ட் லைக் தட் என வீழ்த்துவது எல்லாம் காதுல பூக்கூடை.

கொஞ்சம் கூட கவலையேப் படாமல் விமானத்தில் இருந்தும் பாலத்தில் இருந்தும் புல்டோசரிலிருந்தும் ஆளாளுக்கு ஜம்ப் பண்ணிக் கொண்டே இருக்கிறார்கள்.

படம் முடிந்து வெளியில் வந்ததும் ட்ராபிக்கில் பாய்ந்து பைக்கை ஓட்டி வீட்டுக்கு வந்தது தான் இந்த படத்தின் தாக்கமும் வெற்றியும்.

ஆரூர் மூனா செந்தில்